पंचनामा प्रतिनिधी लौकी (ता. आंबेगाव) – दिवाळी म्हटली की किल्ले निर्मितीचा उत्साह आणि रंगीबेरंगी रांगोळ्यांची आकर्षक सजावट आलीच. या पारंपरिक उत्सवाला ऐतिहासिक वारसा आणि सामाजिक प्रबोधनाची जोड देत लौकी येथे किल्ले निर्मिती, रांगोळी रेखाटन व रंगभरण स्पर्धांचे आयोजन करण्यात आले. या स्पर्धांना सुमारे ५० स्पर्धकांनी उत्स्फूर्त सहभाग नोंदविला.
दिवाळीच्या पार्श्वभूमीवर समस्त ग्रामस्थ, नवतरुण मंडळ, सावली फाउंडेशन (आंबेगाव तालुका) आणि अखिल भारतीय साने गुरुजी कथामाला, पुणे जिल्हा समिती (ग्रामीण) यांच्या संयुक्त विद्यमाने हा उपक्रम राबविण्यात आला.
स्पर्धेत छत्रपती शिवाजी महाराजांच्या स्वराज्याचा गौरवशाली इतिहास अधोरेखित करणाऱ्या प्रतापगड, शिवनेरी, रायगड, सिंहगड, तोरणा, सिंधुदुर्ग, विजयदुर्ग, पन्हाळा, पुरंदर, मल्हारगड आणि कुलाबा आदी ऐतिहासिक किल्ल्यांच्या प्रतिकृती साकारण्यात आल्या. बालचिमुकल्यांनी कल्पकतेने आणि मेहनतीने उभारलेल्या किल्ल्यांनी उपस्थितांचे लक्ष वेधून घेतले.
महिलांच्या रांगोळी स्पर्धेतून विविध सामाजिक आणि पर्यावरणविषयक प्रश्नांवर प्रभावी भाष्य करण्यात आले. वृक्षतोड, नैसर्गिक आपत्ती, जंगल वाचवा-निसर्ग वाचवा, बालपण हरवले, एआय वरदान की शाप, शेतकरी, पाणी बचत, पर्यावरण प्रदूषण आणि मानवी आरोग्य अशा विषयांवर आकर्षक रांगोळ्यांच्या माध्यमातून जनजागृती करण्यात आली.
या उपक्रमामुळे बालकांना ऐतिहासिक किल्ल्यांचा वारसा समजण्यास मदत झाली, तर महिलांना सामाजिक विषयांवर कलात्मक पद्धतीने आपले विचार मांडण्याची संधी मिळाली. मनोरंजनासोबतच सहकार्य, देशभक्ती, सांस्कृतिक जतन, पर्यावरण संवर्धन आणि सामाजिक एकतेचा संदेश या माध्यमातून देण्यात आला. ग्रामस्थ व महिलांनी मोठ्या संख्येने उपस्थित राहून स्पर्धकांच्या कलागुणांना दाद दिली.
दिवाळीच्या प्रकाशपर्वात इतिहासाचा अभिमान, कलेचा आविष्कार आणि सामाजिक प्रबोधनाचा संगम घडविणारा लौकी येथील हा उपक्रम परिसरात कौतुकाचा विषय ठरला.
