पुण्यश्लोक अहिल्यादेवी होळकर कर्जमुक्ती योजनेअंतर्गत याद्या प्रसिद्ध !!
शेतकऱ्यांच्या थकबाकी रक्कमेत तफावतीसंदर्भात योजनेच्या पोर्टलवरील थकबाकीची रक्कम ग्राह्य धरावी- सहकार आयुक्त दिपक तावरे
पंचनामा प्रतिनिधी – पुण्यश्लोक अहिल्यादेवी होळकर कर्जमुक्ती योजनेतील गावपातळीवर प्रसिध्द झालेल्या याद्यांमध्ये व्यापारी बँकांमधील एनपीए खातेदार शेतकऱ्यांच्या नावासमोर दर्शविलेल्या थकबाकी रक्कम तसेच योजनेच्या पोर्टलवरील रकमेत फरक असल्याचे निदर्शनास आले आहे. गाव पातळीवर प्रसिद्ध केलेली यादी व योजनेच्या पोर्टलवरील शेतकऱ्यांच्या थकबाकी रक्कमेत फरक असल्यास योजना पोर्टलवरील थकबाकीची रक्कम ग्राह्य धरावी, असे राज्याचे सहकार आयुक्त आणि निबंधक (सहकारी संस्था) दिपक तावरे स्पष्टीकरण दिले आहे.
योजनेच्या पोर्टलवर दिसणारी शेतकऱ्यांच्या कर्जाची थकबाकीची रक्कम ३१.३.२०२६ रोजीची आहे. शासनाने १.७.२०२६ रोजीच्या पत्रान्वये सर्व बँकांना १.४.२०२६ नंतरच्या व्याजाची रक्कम न आकारणाच्या सुचना दिलेल्या आहेत व सर्व बँकांनी त्या मान्य असल्याचे लेखी कळविले आहे. शेतकऱ्यास योजनेच्या पोर्टलवर दिसणारी रक्कम मान्य असल्यास त्यांनी आधार प्रमाणीकरण करावे. आधार प्रमाणीकरण केल्यानंतर शेतकऱ्यास आधार प्रमाणीकरण यशस्वी झाल्याची पावती प्राप्त होणार आहे. या पावतीमध्ये शेतकऱ्याची कर्जमुक्ती होणाऱ्या रक्कमेची माहिती उपलब्ध आहे.
आधार प्रमाणीकरण केल्यानंतर शेतकऱ्यांचे दिनांक ३१.०३.२०२६ वरील कर्जबाकीच्या लाभाची रक्कम त्यांच्या कर्जखात्यात DBT द्वारे जमा केली जाणार आहे. उपरोक्त कर्जमुक्तीनंतर शेतकऱ्यास कर्ज बेबाकी प्रमाणपत्र देण्यात येणार आहे. कर्ज मुक्ती झाल्यानंतर सर्व कर्जमुक्ती शेतकऱ्यांच्या याद्या संबंधित बँकेंच्या शाखेत व विविध कार्यकारी सेवा संस्थांमध्ये लावण्यात येतील. कर्जमुक्तीचा लाभ मिळालेल्या सर्व शेतकऱ्यांना संबंधित बँकेमार्फत खरीप पीक कर्जाची उपलब्धता होणार आहे.
योजनेच्या पोर्टलवरील रक्कम किंवा पोर्टलवरील शेतकऱ्यांच्या कर्जाबाबत इतर कोणताही तपशील शेतकऱ्यास अमान्य असल्यास त्याने पोर्टलवर तक्रारीची नोंद करावी. या तक्रारीचे निराकरण जिल्हाधिकारी यांच्या अध्यक्षतेखालील जिल्हास्तरीय समिती मार्फत केले जाईल.
कर्जमाफी व एकवेळ समझोता घटकाकरिता योजनेच्या पोर्टलवर बँकांनी एकूण ३१.१७ लाख कर्जखात्यांची माहिती अपलोड केली आहे. बँकेमार्फत सादर केलेल्या कर्जखात्यांचे महा-आयटी मार्फत योजना निकषानुसार संगणकीय संस्करण करुन २५ जुलै २०२६ रोजी एकूण १६.९६ लाख कर्जखात्यांची यादी आधार प्रमाणीकरणासाठी प्रसिद्ध करण्यात आली आहे. यामध्ये जिल्हा मध्यवर्ती सहकारी बँकेकडील ७.०३ लाख कर्जखाती व व्यापारी बँकांकडील ९.९३ लाख कर्जखात्यांचा समावेश आहे, असेही श्री. तावरे यांनी प्रसिद्धी पत्रकान्वये कळविले आहे.
