पंचनामा प्रतिनिधी – लोणी ( ता.आंबेगाव ) येथील बुधवारच्या आठवडे बाजारात वाढत्या उष्णतेमुळे ग्राहकांचा शुकशुकाट होता.येथील आठवडे बाजारात येणार्या लहान मोठ्या व्यापार्यांना अक्षराशा ग्राहकांची वाट पहात बसावे लागल्याचे चित्र पाहावयास मिळाले.
सध्या आंबेगाव तालुक्यात उन्हाची तीव्रता वाढत असून पारा ४० अंशाच्या उंबरठ्यावर पोहोचला. आंबेगावच्या तालुक्याच्या पूर्व भागातील लोणी येथील आठवडे बाजार सर्वात मोठा बाजार असून आंबेगाव, खेड, शिरूर तालुक्यातील जवळ-जवळ ३५ ते ४० गावांचा संपर्क या बाजाराशी असतो. पण सध्या वाढत्या उष्णतेमुळे ग्राहकांनी बाजाराकडे पाठ फिरवल्याने बाजारात ग्राहकांची फारच वर्दळ कमी होती.
सध्या या भागात कमाल तापमान ३५ ते ४० अंश सेल्सिअस पर्यंत पोहचले आहे.उन्हाची दाहकता वाढल्याने जीवाची घालमेलही वाढली आहे.
जिल्ह्यात यावर्षी हिवाळ्यात थंडी अधिक प्रमाणात जाणवलीच नाही.पण उन्हाळ्याला लवकर सुरूवात झाली.कारण फेब्रुवारीतच जिल्ह्यातील कमाल तापमान ३५ अंशावर गेले होते.तर मार्च महिना सुरू झाल्यानंतर उन्हाची तीव्रता आणखी वाढली.
मागील काही दिवसांत तर दुपारच्या सुमारास उन्हाच्या तीव्र झळा सोसाव्या लागत आहेत.अशातच पुणे जिल्ह्याच्या ग्रामीण भागात कमाल तापमानात वाढ होताना दिसुन येत आहे.
यामुळे दिवसभर उन्हाच्या झळा सोसण्याची वेळ लोकांवर आली आहे. त्यामुळे ग्राहकांनी बाजारात येण्याऐवजी घरात बसणे पसंत केले.त्याचबरोबर उन्हाची तीव्रता वाढल्याने ग्रामीण भागातील रस्तेही ओस पडू लागलेत. त्यामुळे आठवडे बाजारातही शीतपेयांना मागणी वाढलेली आहे.
लोणी (ता.आंबेगाव ) येथील आठवडे बाजारात उष्णतेमुळे ग्राहकांनी फिरवली पाठ
