पंचनामा प्रतिनिधी -जारकरवाडी ( ता. आंबेगाव ) येथील आदर्श माध्यमिक विद्यालयाने खो खो तालुकास्तरीय स्पर्धात १७ वर्षाखालील मुले व १४ वर्षाखालील मुलींच्या संघाने द्वितीय क्रमांक पटकावला आहे.
जिल्हा क्रीडा अधिकारी कार्यालय, जिल्हा परिषद पुणे आणि आंबेगाव तालुका क्रीडा शिक्षक संघटना यांच्या संयुक्त विद्यमाने रांजणी ( ता. आंबेगाव ) येथे तालुका स्तरावरील शालेय क्रीडा पार पडल्या यावेळी आंबेगाव तालुकास्तरीय खो-खो स्पर्धेत आदर्श माध्यमिक विद्यालयाच्या खेळाडूंनी उत्कृष्ट कामगिरी करत विद्यालयाच्या शिरपेचात मानाचा तुरा खोवला.
दोन्ही संघांनी संपूर्ण स्पर्धेत आक्रमक व शिस्तबद्ध खेळाचे प्रदर्शन करत प्रतिस्पर्धी संघांना कडवी झुंज दिली.
या यशासाठी विद्यालयाचे क्रीडा मार्गदर्शक मोमीन सर व संजय वळसे सर यांचे मोलाचे मार्गदर्शन लाभले. खेळाडूंचा सराव, योग्य नियोजन आणि सातत्यपूर्ण मेहनतीमुळे विद्यालयाला हे यश मिळाले.
यशस्वी खेळाडू तसेच क्रीडा शिक्षकांचे विद्यालय प्रशासन, मुख्याध्यापक, शिक्षक-शिक्षकेतर कर्मचारी आणि ग्रामस्थांनी अभिनंदन केले. या कामगिरीमुळे आदर्श माध्यमिक विद्यालयाच्या क्रीडा क्षेत्रातील यशाची परंपरा अधिक बळकट झाली असून पुढील स्पर्धांसाठी खेळाडूंना शुभेच्छा देण्यात आल्या.
