बाजरी फुलोऱ्यात; उत्पादन घटण्याची शक्यता — नगदी पिकेही अडचणीत, वाढता शेती खर्च शेतकऱ्यांसाठी डोकेदुखी
पंचनामा लोणी धामणी : लोणी-धामणी परिसरात यंदा बाजरीचे पीक फुलोऱ्यात आले असून, सध्या पावसाने दडी मारल्याने शेतकऱ्यांची चिंता वाढली आहे. बाजरी पिकाला ऐन फुलोऱ्याच्या अवस्थेत पावसाची गरज असताना पावसाने ओढ दिल्याने उत्पादनात घट होण्याची शक्यता निर्माण झाली आहे.
या परिसरातील शेतकऱ्यांचे बाजरी हे प्रमुख पीक असून, बाजरीचे पीक चांगले आल्यास वर्षभराच्या अन्नधान्याची गरज मोठ्या प्रमाणात भागते. त्यामुळे बाजरीच्या उत्पादनाकडे शेतकऱ्यांचे विशेष लक्ष असते. मात्र, सध्या पावसाने दडी मारल्याने फुलोऱ्यात आलेल्या बाजरी पिकावर परिणाम होण्याची भीती शेतकऱ्यांकडून व्यक्त केली जात आहे.
पावसाअभावी बाजरीबरोबरच इतर नगदी पिकांनाही अडचणींचा सामना करावा लागत आहे. पिकांना आवश्यक वेळी पाणी मिळत नसल्याने उत्पादनावर परिणाम होण्याची शक्यता आहे. त्यामुळे शेतकऱ्यांच्या आर्थिक गणितावरही त्याचा परिणाम होणार आहे.
दरम्यान, शेतीचा वाढता भांडवली खर्च शेतकऱ्यांसाठी मोठी समस्या बनत आहे. खते, औषधे, बियाणे तसेच मजुरीच्या दरात वाढ होत असताना नगदी पिकांना अपेक्षित बाजारभाव मिळत नसल्याने उत्पादन खर्च आणि उत्पन्न यांचा ताळमेळ साधणे शेतकऱ्यांना कठीण जात आहे.
पिकांची वाढती उत्पादनखर्चाची जोखीम, हवामानातील अनिश्चितता आणि बाजारभावातील चढ-उतार यामुळे शेतकरी आर्थिक अडचणीत सापडत आहेत. त्यामुळे बाजरीसह इतर पिकांसाठी योग्य बाजारभाव मिळावा तसेच शेतकऱ्यांना उत्पादन खर्चाच्या तुलनेत समाधानकारक उत्पन्न मिळावे, अशी अपेक्षा परिसरातील शेतकऱ्यांकडून व्यक्त होत आहे.
