अखंड हरिनाम सप्ताहाच्या शताब्दी महोत्सवानिमित्त १०१ रक्तदात्यांचे रक्तदान; महाआरोग्य शिबिरालाही उत्स्फूर्त प्रतिसाद
पंचनामा प्रतिनिधी धामणी : श्रीकृष्ण जन्माष्टमीनिमित्त आयोजित अखंड हरिनाम सप्ताहाच्या शताब्दी महोत्सवानिमित्त धामणी येथे भक्ती, अध्यात्म आणि सामाजिक बांधिलकीचा अनोखा संगम पाहायला मिळाला. या शताब्दी महोत्सवाचे औचित्य साधून आयोजित करण्यात आलेल्या रक्तदान शिबिरात तब्बल १०१ रक्तदात्यांनी उत्स्फूर्तपणे रक्तदान करून सामाजिक बांधिलकी जपली. त्याचबरोबर आयोजित करण्यात आलेल्या महाआरोग्य शिबिरालाही ग्रामस्थांनी मोठा प्रतिसाद दिला.
पुना ब्लड सेंटर, नारायणगाव यांच्या सौजन्याने रक्तदान शिबिराचे आयोजन करण्यात आले. ‘रक्तदान हेच श्रेष्ठ दान’ या भावनेतून तरुणांसह ग्रामस्थांनी मोठ्या संख्येने सहभाग नोंदविला. धार्मिक उत्सवाला सामाजिक उपक्रमाची जोड देत रक्तदानाच्या माध्यमातून गरजू रुग्णांना मदतीचा हात देण्याचा आदर्श धामणी ग्रामस्थांनी निर्माण केला.
याचबरोबर जय हिंद प्रतिष्ठान, धामणी, पुना डायग्नोस्टिक सेंटर आणि न्यू लाईफ वेलनेस सेंटर, पुणे यांच्या सौजन्याने भव्य महाआरोग्य शिबिराचे आयोजन करण्यात आले. या शिबिरामध्ये विविध आरोग्य तपासण्या व वैद्यकीय मार्गदर्शनाचा लाभ ग्रामस्थांनी घेतला.
शताब्दी महोत्सवाच्या निमित्ताने धार्मिक कार्यक्रमासोबत समाजोपयोगी उपक्रम राबविण्यात आल्याने या उपक्रमाचे सर्व स्तरातून कौतुक होत आहे. ‘भक्तीची परंपरा आणि सेवाभावाची संस्कृती’ यांचा सुंदर मिलाफ या उपक्रमातून अनुभवायला मिळाला.
श्रीकृष्ण जन्माष्टमीचा उत्सव केवळ धार्मिक सोहळा न राहता मानवसेवेचा संदेश देणारा सामाजिक उत्सव ठरला. १०१ रक्तदात्यांनी केलेले रक्तदान आणि महाआरोग्य शिबिराला मिळालेला प्रतिसाद हा धामणीच्या सामाजिक एकजुटीचा आणि सेवाभावी संस्कृतीचा प्रेरणादायी नमुना ठरला.
