पंचनामा प्रतिनिधी – पारगाव (ता.आंबेगाव) येथे ग्रामपंचायत हद्दीत ‘माणुसकीची भिंत’ उपक्रम सुरू करण्यासाठी स्वतंत्र जागा उपलब्ध करून देण्यात यावी,अशी मागणी ग्रामपंचायत सदस्य व माजी उपसरपंच विठ्ठल सिताराम ढोबळे यांनी सरपंच श्वेता ढोबळे व के.डी.भोजणे ग्रामविकास अधिकाऱ्यांकडे लेखी अर्जाद्वारे केली आहे.
माजी उपसरपंच विठ्ठल ढोबळे यांनी आपल्या अर्जात नमूद केले आहे की,गावातील नागरिकांकडे वापरात नसलेले पण चांगल्या स्थितीत असलेले पुरुष, स्त्रिया आणि मुलांचे कपडे या भिंतीवर ठेवता येतील.त्यामुळे गावातील तसेच परिसरातील गरीब व गरजू कुटुंबांना मोठी मदत मिळणार आहे.अनेक गावांमध्ये हा उपक्रम यशस्वी ठरला असून,पारगावमध्ये तो राबवल्यास पंचक्रोशीतील इतर ग्रामपंचायतींसाठीही आदर्श निर्माण होईल,असेही त्यांनी नमूद केले आहे.
‘माणुसकीची भिंत’ नावाने भिंत उभारून गरजूंसाठी विनामूल्य कपडे उपलब्ध करणे हा उपक्रम सामाजिक ऐक्य वृद्धिंगत करणारा असून, ग्रामपंचायतीमार्फत हा उपक्रम राबविण्यात यावा,अशा आशयाचे आवाहनही त्यांनी ग्रामस्थांना केले आहे.
अर्जावर पुढील कार्यवाही करून गावात योग्य ठिकाणी ही भिंत उभारावी,अशी मागणी माजी उपसरपंच विठ्ठल ढोबळे यांनी आपल्या अर्जात केली आहे.
