आई-वडिलांच्या स्मरणार्थ खडकवाडी ग्रामस्थांचा एकत्रित चौथभरणीचा उपक्रम ; पितृपंधरवड्यानिमित्त सामूहिक चौथभरणी; ग्रामस्थांच्या एकजुटीचे दर्शन !!
पंचनामा प्रतिनिधी | खडकवाडी
आंबेगाव तालुक्यातील खडकवाडी येथे पितृपंधरवड्याचे औचित्य साधून ग्रामस्थांच्या वतीने आपल्या दिवंगत आई-वडील व पूर्वजांच्या स्मरणार्थ सामूहिक चौथभरणीचा अभिनव उपक्रम राबविण्यात आला. गावातील सर्व ग्रामस्थांनी एकत्र येत हा धार्मिक व सामाजिक उपक्रम उत्साहपूर्ण वातावरणात संपन्न केला.
पितृपंधरवडा हा आपल्या पूर्वजांचे स्मरण करून त्यांच्या ऋणाची जाणीव ठेवण्याचा महत्त्वाचा काळ मानला जातो. या पार्श्वभूमीवर खडकवाडी ग्रामस्थांनी प्रत्येक कुटुंबाने स्वतंत्रपणे कार्यक्रम न करता सर्वांनी एकत्रित येऊन चौथभरणीचा कार्यक्रम करण्याचा निर्णय घेतला. या उपक्रमातून पूर्वजांप्रती कृतज्ञता व्यक्त करण्याबरोबरच गावातील सामाजिक एकोपा आणि परस्पर सहकार्याची भावना अधोरेखित झाली.
खडकवाडी गावामध्ये विविध सामाजिक, धार्मिक आणि सांस्कृतिक उपक्रम नेहमीच अभिनव पद्धतीने राबविले जातात. कोणताही उपक्रम असो, त्यामध्ये गावातील ग्रामस्थ एकत्रितपणे सहभागी होतात. ‘एक गाव, एक विचार आणि एकजूट’ हीच खडकवाडी गावाची ओळख असून, सामूहिक चौथभरणीच्या उपक्रमातून पुन्हा एकदा या एकजुटीचे दर्शन घडले.
या कार्यक्रमात ग्रामस्थांनी आपल्या आई-वडिलांसह पूर्वजांचे स्मरण केले. आपल्या जीवनासाठी त्याग आणि संस्कार देणाऱ्या आई-वडिलांप्रती कृतज्ञता व्यक्त करण्याची संधी या उपक्रमामुळे मिळाली. धार्मिक परंपरेला सामाजिक बांधिलकीची जोड देत ग्रामस्थांनी एकत्रितपणे हा उपक्रम राबविल्याने परिसरातून त्याचे कौतुक होत आहे.
गावातील ज्येष्ठ नागरिक, महिला, युवक तसेच ग्रामस्थांनी या उपक्रमात उत्स्फूर्त सहभाग घेतला. अशा सामूहिक उपक्रमांमुळे गावातील आपुलकीचे संबंध अधिक दृढ होण्यास मदत होते. तसेच नवीन पिढीला आपल्या परंपरा, संस्कार आणि पूर्वजांविषयी आदराची जाणीव निर्माण होते, असा सूर यावेळी ग्रामस्थांमधून व्यक्त झाला.
खडकवाडी ग्रामस्थांनी धार्मिक परंपरेला सामाजिक एकतेची जोड देत राबविलेला हा उपक्रम ‘गावाच्या एकजुटीतून समाजहित’ या भावनेचा आदर्श ठरला आहे असे मत खडकवाडी गावचे मा.सरपंच अनिल डोके यांनी पंचनामाशी बोलताना सांगितले.
