‘या’ तारखेला PM मोदींची भेट घेऊन शेतकऱ्यांचे प्रश्न मांडणार ! उपमुख्यमंत्री अजित पवार यांचे प्रतिपादन

‘या’ तारखेला PM मोदींची भेट घेऊन शेतकऱ्यांचे प्रश्न मांडणार ! उपमुख्यमंत्री अजित पवार यांचे प्रतिपादन

आपण 18 जुलै रोजी पंतप्रधान नरेंद्र मोदी यांची भेट घेणार असून या बैठकीत राज्यातील शेतकऱ्यांच्या समस्या मांडणार आहेत असे उपमुख्यमंत्री अजित पवार यांनी म्हटले आहे. ते आज येथे पत्रकारांशी बोलत होते. ते म्हणाले की, प्रफुल्ल पटेल आणि मी राष्ट्रीय लोकशाही आघाडीच्या म्हणजेच एनडीएच्या बैठकीला उपस्थित राहणार आहोत. शासन आपल्या दारी’ कार्यक्रमाला उपस्थित राहण्यासाठी उपमुख्यमंत्री नाशिकमध्ये दाखल झाले त्यावेळी ते पत्रकारांशी बोलत होते.

राष्ट्रवादीला अर्थखाते देण्यास शिंदे गटाचा विरोध आहे त्यांना त्यासाठी मुख्यमंत्रीपद सोडण्यास सांगण्यात आल्याचा दावा ठाकरे गटाचे नेते संजय राऊत यांनी केला होता. त्या विषयी विचारले असता अजित पवार म्हणाले की, मला याबाबत माहित नाही. विनाकारण वातावरण बिघडवण्याचा हा प्रयत्न आहे. पोर्टफोलिओ वाटपामुळे आम्ही आनंदी आहोत. जवळपास 14 पदे (मंत्रिमंडळात) रिक्त आहेत आणि मंत्रिमंडळाचा विस्तार हा मुख्यमंत्र्यांचा विशेषाधिकार आहे, असे ते म्हणाले.

मंत्रिमंडळ विस्ताराबाबत विचारलेल्या प्रश्नाला उत्तर देताना पवार आणखी म्हणाले की, त्यावर मुख्यमंत्री निर्णय घेतील, मी त्यावर बोलणार नाही. शिंदे यांच्या नेतृत्वाखालील सरकारमध्ये आता 28 कॅबिनेट मंत्री आहेत पण राज्यमंत्री नाही. राज्य मंत्रालयाचा विस्तारही शुक्रवारी होईल, अशी अटकळ बांधली जात होती, मात्र ती झाली नाही. राज्यातील प्रलंबित नागरी निवडणुकांबाबत विचारले असता पवार म्हणाले की, इतर मागासवर्गीय (ओबीसी) आरक्षणासह चार ते पाच मुद्दे सर्वोच्च न्यायालयात प्रलंबित आहेत. महाराष्ट्र निवडणूक आयोगाने मतदार याद्या तयार करण्याचे आदेश जारी केले आहेत. मतदार याद्या पूर्ण झाल्यानंतर आणि संबंधित मुद्द्यांवर सर्वोच्च न्यायालयाने निकाल दिल्यानंतर राज्यात निवडणुका होतील, असेही ते म्हणाले.

राज्यात समसमान प्रगती होईल आणि कोणतेही मतभेद नसतील. राज्यात अनेक समाज आणि जाती आहेत. आम्ही सर्वांना बरोबर घेऊन चालणार आहोत. ‘महायुती’मध्ये आम्ही एकत्र काम करू, असे ते म्हणाले. नाशिकमध्ये त्यांच्या स्वागतासाठी लावण्यात आलेल्या पोस्टर्समध्ये राष्ट्रवादीचे संस्थापक शरद पवार यांची छायाचित्रे नसल्याकडे लक्ष वेधले असता ते म्हणाले, “पवार साहेब आमचे प्रेरणास्थान आहेत, आमचे आराध्य दैवत आहेत. त्यांचा फोटो माझ्या केबिनमध्ये आहे.

शरद पवार यांच्या निवासस्थानी दिलेल्या भेटीबद्दल बोलताना ते म्हणाले की, राजकारण आणि कुटुंब या वेगळ्या गोष्टी आहेत. आम्ही कौटुंबिक आणि परंपरांना महत्त्व देतो. काकी (प्रतिभा पवार) यांना काही दुखापत झाली होती आणि त्यांच्यावर शस्त्रक्रिया करण्यात आली होती. मला दुपारी जायचे होते, पण जाता आले नाही त्यामुळे काल संध्याकाळी भेट दिली. पवार साहेब, काकी आणि सुप्रिया (सुळे) तिथे होते. त्यावेळी राजकारणावर कोणतीही चर्चा झाली नाही. राष्ट्रवादीचे नाव आणि चिन्हाच्या दाव्यावर अजित पवार म्हणाले की, “आम्ही लोकांचे प्रश्‍न सोडवण्यासाठी सरकारमध्ये आहोत. कोणाच्याही आमदारकीला त्रास होणार नाही. ज्यांनी आम्हाला पाठिंबा दिला, त्यांच्या विश्‍वासाला धक्‍का लागणार नाही.

सध्याच्या पाण्याच्या परिस्थितीबद्दल बोलताना ते म्हणाले की, राज्यात या वर्षी आतापर्यंत पुरेसा पाऊस झाला नाही. धरणांमधील पाण्याची पातळी खालावली असून पाणी जपून वापरण्याची गरज असल्याचे पवार म्हणाले. वंदे भारत एक्‍स्प्रेस ट्रेनने पवार यांचे नाशिकला आगमन झाले, तेथे त्यांचे जंगी स्वागत करण्यात आले