पंचनामा प्रतिनिधी – समर्थ रुरल एज्युकेशनल इन्स्टिट्यूट संचलित समर्थ ज्युनिअर कॉलेज, बेल्हे येथील विद्यार्थिनी इशिता काकडे हिने रायफल शूटिंग स्पर्धेत उल्लेखनीय कामगिरी करत विभागीय स्तरावर द्वितीय क्रमांक पटकावला आहे. या यशाच्या जोरावर तिची नागपूर येथे होणाऱ्या राज्यस्तरीय रायफल शूटिंग स्पर्धेसाठी निवड झाली आहे. इशिताच्या या यशामुळे समर्थ शैक्षणिक संकुलाच्या क्रीडा क्षेत्रातील यशात आणखी एक मानाचा तुरा रोवला गेला आहे.
रायफल शूटिंगसारख्या खेळामध्ये एकाग्रता, अचूकता, संयम आणि सातत्यपूर्ण सराव यांना विशेष महत्त्व असते. या गुणांच्या जोरावर इशिता काकडे हिने विभागीय स्तरावरील स्पर्धेत उत्कृष्ट कामगिरी केली. स्पर्धेतील तिच्या या यशामुळे तिला आता राज्यस्तरावर आपले कौशल्य सिद्ध करण्याची संधी मिळणार आहे. नागपूर येथे होणाऱ्या राज्यस्तरीय स्पर्धेतही ती यशस्वी कामगिरी करेल, असा विश्वास व्यक्त केला जात आहे.
इशिताला समर्थ शैक्षणिक संकुलाचे क्रीडा संचालक एच. पी. नरसुडे, क्रीडा शिक्षक सुरेश काकडे, विनायक वऱ्हाडी आणि किशोर काकडे यांचे मार्गदर्शन लाभले. प्रशिक्षकांचे मार्गदर्शन, नियमित सराव आणि मेहनत यांच्या बळावर तिने हे यश संपादन केले आहे.इशिताच्या या उल्लेखनीय यशाबद्दल संस्थेचे अध्यक्ष वसंतराव शेळके, उपाध्यक्ष माऊलीशेठ शेळके, सचिव विवेक शेळके, विश्वस्त वल्लभ शेळके,माजी जिल्हा परिषद सदस्या स्नेहलताई शेळके, कॅम्पस डायरेक्टर प्रा.राजीव सावंत,ज्युनिअर कॉलेजच्या प्राचार्या वैशाली आहेर आणि प्रशासकीय अधिकारी प्रा. प्रदीप गाडेकर यांनी तिचे अभिनंदन केले. तसेच संकुलातील सर्व विभागांच्या प्राचार्यांनीही तिच्या यशाचे कौतुक करून आगामी राज्यस्तरीय स्पर्धेसाठी शुभेच्छा दिल्या.
इशिता काकडे हिच्या या यशामुळे समर्थ शैक्षणिक संकुलातील विद्यार्थ्यांना क्रीडा क्षेत्रात प्रगती करण्यासाठी निश्चितच प्रेरणा मिळणार असून, राज्यस्तरीय स्पर्धेतही ती आपल्या कामगिरीने विद्यालयाचा नावलौकिक वाढवेल,अशी अपेक्षा व्यक्त होत आहे.
