एचपीटी कॉलेजमध्ये कम्युनिटी आउटरीचसह साजरा केला पतंग सप्ताह!!

एचपीटी कॉलेजमध्ये कम्युनिटी आउटरीचसह साजरा केला पतंग सप्ताह

नाशिक (वार्ताहर) :- येथील एच.पी.टी. कला आणि आर.वाय.के. विज्ञान महाविद्यालयातील प्राणीशास्त्र विभागाने पतंग सप्ताह साजरा करण्यासाठी समुदाय पोहोच कार्यक्रम २४ जुलै रोजी आयोजित केला. गोखले एज्युकेशन सोसायटी कॅम्पस, कॉलेज रोड, नाशिक येथे हा कार्यक्रम झाला आणि त्यात विद्यार्थी, प्राध्यापक आणि विविध क्षेत्रातील नागरिकांचा उत्साही सहभाग दिसला.
पतंगांच्या पर्यावरणीय महत्त्वाबद्दल जागरुकता निर्माण करणे आणि वैज्ञानिक उपक्रमांमध्ये सामान्य नागरिकांना सहभागी करून घेणे हा या कार्यक्रमाचा उद्देश होता. उपस्थितांना विविध पतंगांच्या प्रजातींचे निरीक्षण करण्याची आणि जागतिक वैज्ञानिक संशोधनात योगदान देणाऱ्या डेटा संकलन प्रयत्नांमध्ये सहभागी होण्याची संधी होती.
प्रादेशिक वनाधिकारी डॉ. शेखर देवकर यांच्या उपस्थितीने कार्यक्रमाला महत्त्वाची जोड दिली. त्यांनी पर्यावरण संवर्धनाला चालना देण्यासाठी शैक्षणिक आणि सरकारी संस्था यांच्यातील सहकार्याचे महत्त्व अधोरेखित केले. तसेच जैवविविधतेच्या अभ्यासाद्वारे उत्पन्न केलेल्या वैज्ञानिक डेटाचे मूल्य आणि संवर्धनाच्या उद्देशांसाठी त्याचा उपयोग स्पष्ट केला.

प्राचार्य डॉ. व्ही.एन. सूर्यवंशी यांनी महाविद्यालयाच्या शंभराव्या वर्धापन वर्षी, शिक्षण शेत्रातच नव्हे तर सामान्य लोकांना वैज्ञानिक उपक्रमांमध्ये सक्रियपणे सहभागी होण्यासाठी प्रोत्साहित करण्याचा उपक्रम राबविल्याबाबद्दल आनंद व्यक्त केला.

डॉ. सचिन ए. गुरुळे यांनी त्यांच्या भाषणात उपस्थितांना पतंगांच्या आकर्षक जगाची ओळख करून दिली. पतांगांची विविधता आणि पर्यावरणीय महत्त्व सांगितले. उपस्थित पतंगांच्या विविध रंगी प्रजाती पाहून मंत्रमुग्ध झाले.
डॉ. अदिती सुनील शेरे-खरवार, सहाय्यक प्राध्यापिका आणि प्राणीशास्त्र विभागाच्या कार्यक्रमाच्या समन्वयक यांनी, तरुण पिढीमध्ये निसर्गाप्रती जबाबदारीची भावना वाढवण्यासाठी अशा उपक्रमांच्या महत्त्वावर भर दिला आणि जैवविविधतेचे विस्तृतपणे दस्तऐवजीकरण करण्याची निकडीची गरज आहे असे नमूद केले.

प्राणीशास्त्र विभागाचे प्रमुख प्रा.डॉ.सी.एस.जावळे यांच्या बरोबर, इतर उल्लेखनीय उपस्थितांमध्ये वरिष्ठ कर्मचारी सहयोगी प्राध्यापीका डॉ. सुप्रिया सिंग गुप्ता, वन्यजीव छायाचित्रकार अनंत (बाळा) सरोदे, महिंद्रा अँड महिंद्राचे निवृत्त महाव्यवस्थापक सतीश गोगटे, बेळगावधगाचे सरपंच दत्तूभाऊ ढगे होते.

पर्यावरण शिक्षण आणि सामुदायिक सहभागासाठी महाविद्यालयाची बांधिलकी दर्शवणारा समुदाय पोहोच कार्यक्रम यशस्वी ठरला. जैवविविधता संवर्धनासाठी जागरूकता आणि कृतीला चालना देण्यासाठी प्राणीशास्त्र विभाग नियमितपणे अशा कार्यक्रमांचे आयोजन करतो. 26 जानेवारी 2024 रोजी अशोक अस्टोरिया, गोवर्धन येथे असाच कार्यक्रम ह्या आधी आयोजित करण्यात आला होता.

नाशिक येथे एचपीटी कॉलेजमध्ये पतंग महोत्सव सप्ताहाच्या समारोपप्रसंगी वनाधिकारी शेखर देवकर समवेत उपस्थित मान्यवर व विद्यार्थी.