पंचनामा प्रतिनिधी – आषाढी वारीच्या पार्श्वभूमीवर जिल्हा परिषद प्राथमिक शाळा ढोबळेवाडी (जारकरवाडी) येथे पारंपरिक दिंडी सोहळ्याचे उत्साहपूर्ण आयोजन करण्यात आले.
यावेळी विद्यार्थी व विद्यार्थिनींनी वारकऱ्यांची आकर्षक वेशभूषा परिधान करून हातात टाळ, गळ्यात मृदुंग आणि डोक्यावर तुळशी वृंदावन घेऊन विठ्ठल नामाचा गजर करत दिंडीत सहभाग नोंदविला. संपूर्ण परिसर भक्तिमय वातावरणाने दुमदुमून गेला.
या दिंडी सोहळ्यास शालेय व्यवस्थापन समितीचे पदाधिकारी, ग्रामस्थ तसेच पालक मोठ्या संख्येने उपस्थित होते. विद्यार्थ्यांमध्ये वारकरी परंपरेचे संस्कार रुजावेत, संत परंपरेची ओळख व्हावी आणि भारतीय संस्कृतीचे जतन व्हावे, या उद्देशाने या उपक्रमाचे आयोजन करण्यात आले.
या उपक्रमाचे नियोजन व आयोजन मुख्याध्यापक अशोक हिंगे, सहशिक्षिका हिंगे मॅडम, अंगणवाडी सेविका लताश्री लबडे आणि निर्मला पाचपुते यांनी केले. उपस्थितांनी विद्यार्थ्यांच्या सादरीकरणाचे कौतुक करत अशा सांस्कृतिक उपक्रमांमुळे मुलांमध्ये संस्कार, शिस्त आणि सामाजिक जाणीव विकसित होत असल्याचे मत व्यक्त केले.
