पंचनामा सुलतानपूर प्रतिनिधी – सुलतानपूर गावातील जुन्या पिढीतील माता तसेच महाराष्ट्र शासनाचे सेवानिवृत्त जिल्हा अधिकारी संपतराव डावखर आणि सुलतानपूर गावचे सरपंच पंढरीनाथ डावखर यांच्या मातोश्री स्वर्गीय सगुनाबाई रतन डावखर यांच्या स्मृतीप्रित्यर्थ दशक्रिया विधीनिमित्त उपस्थितांना ‘लक्ष्मीतरू’ या औषधी वृक्षाची रोपे भेट देण्यात आली.
स्वर्गीय सगुनाबाई डावखर यांचा दशक्रिया विधी सुलतानपूर येथे संपन्न झाला. यावेळी ह. भ. प. भरत महाराज थोरात यांनी अध्यात्मिक प्रबोधन केले.
लोणी काळभोर-शिंदेवाडीचे सरपंच प्रभाकर जगताप यांनी ‘लक्ष्मीतरू’ वृक्षाचे आयुर्वेदातील महत्त्व विशद केले. विविध आजारांवर या वृक्षाच्या पानांचा उपयोग होत असल्याची माहिती त्यांनी दिली. पर्यावरण संवर्धन आणि सामाजिक बांधिलकी जपत डावखर परिवाराने दशक्रिया विधीस उपस्थित असलेल्या प्रत्येक व्यक्तीस ‘लक्ष्मीतरू’चे एक रोप भेट दिले.
यावेळी पंचायत समितीचे गटनेते संभाजी चव्हाण, विघ्नहर सहकारी साखर कारखान्याचे संचालक सुधीर खोकराळे, कृषी उत्पन्न बाजार समितीचे संचालक माऊली खंडागळे, संचालिका प्रियंका शेळके, पुणे जिल्हा दूध संघाचे संचालक बाळासाहेब खिलारी, महाराष्ट्र विद्युत मंडळाचे सेवानिवृत्त अधिकारी कोंडीभाऊ भोर, लोणी काळभोरचे सरपंच प्रभाकर जगताप, खोडदचे सरपंच शिवाजीराव खरमाळे, रविंद्र थोरात आदी उपस्थित होते.
कार्यक्रमाच्या शेवटी उपस्थितांचे ऋणनिर्देश ह. भ. प. डावखर महाराज यांनी व्यक्त केले.
