धामणी (ता.आंबेगाव) येथील बोल्हाई मंदिराचा कलशारोहन व मूर्ती प्राणप्रतिष्ठापना सोहळा बुधवारी (दि.२६ मार्च २०२५) संपन्न होणार!!
धामणी (ता.आंबेगाव) येथील बोल्हाई मंदिराचा कलशारोहन व मूर्ती प्राणप्रतिष्ठापना सोहळा बुधवारी (दि.२६ मार्च २०२५) संपन्न होणार!!
धामणी (ता.आंबेगाव) येथील बोल्हाईच्या माळावरील श्री कुलदैवत म्हाळसाकांत खंडोबाची बहीण पुरातन ग्रामदेवता श्री बोल्हाई मंदिराच्या जिर्णोध्दाराचे काम ग्रामस्थांच्या रुपये दहा लाखाच्या लोकवर्गणीतून पूर्ण झालेले असून बोल्हाई मंदिराचा कलशारोहन व बोल्हाई मूर्ती प्राणप्रतिष्ठापना सोहळा फाल्गुन कृष्ण पक्ष वार बुधवार भागवत एकादशीच्या (दि २६ मार्च ) शुभदायी मूहर्तावर वेदाचार्य विशालशास्री हाडवळे महाराज, जेष्ठ किर्तनकार महाराज, वारकरी,माळकर्‍याच्या हस्ते होणार असल्याचे ग्रामस्थांनी व सेवेकर्‍यांनी सांगितले.
फाल्गुन शुध्द पापमोचनी एकादशी वार मंगळवार(दि.२५ मार्च) रोजी दुपारी चार वाजता श्री बोल्हाई मूर्तीची व कलशाची आणि मांडवडहाळेची मिरवणूक काढण्यात येणार असून मिरवणूकीत “भक्तीवेदान्त वारकरी शिक्षण संस्था व संत एकनाथ महाराज गुरुकुल खंडाळे रांजणगांव गणपती (ता. शिरुर) येथील ह.भ.प.संतोषमहाराज खेडकर यांचे मार्गदर्शनाखाली या गुरुकुलचे ४० शिक्षार्थी वारकरी टाळ मृदुंगासह सहभागी होणार असून पारंपारिक वाद्यासह समस्त पंचरास मंडळीचा वाजंत्री ताफा मिरवणूकीत सामील होणार आहे.
मिरवणूकीनंतर बोल्हाई मूर्तीचा धान्यवास सोहळा व त्यानंतर पहाडदरा येथील अंबिका भजनी मंडळाचा हरीजागर भक्तीमय भजनाचा कार्यक्रम होणार आहे.बुधवारी (२६ मार्च)सकाळी वेदाचार्य मंदारशास्री क्षिरसागर व प्रमोदकाका देखणे यांचे मार्गदर्शनाखाली श्री गणेश पुण्याह वाचन विधी,शुभारंभ मूर्ती स्थापन विधी,देवता पूजन विधी व अग्निस्थापना होमहवन,पर्यापी हवन व मूर्ती प्राणप्रतिष्ठापना व कलशारोहन व पूर्णाहूती विधी त्यानंतर मान्यवराचे प्रवचन व महाप्रसादाचा कार्यक्रम होणार असल्याचे सांगण्यात आले.
या दिवशी सांयकाळी दिनेश जाधव आणि सहकार्‍याचा बोल्हाई देवीच्या भक्तिमय गीतांचा कार्यक्रम होणार आहे.संध्याकाळी ढोबळेवाडी (ता.आंबेगांव) येथील श्री वडजाई भजनी मंडळाचा संगीतमय भक्तीमय भागवत एकादशीच्या सामूहीक भजन सोहळा होणार असल्याचे सांगण्यात आले.
“शाहीस्नानाचे पुण्य ”
नुकत्याच पार पडलेल्या प्रयागराज येथील शाहीस्नानात सहभागी झाल्यानंतर जेवढे पुण्य पदरी पडते तेवढेच पुण्य देवदेवताच्या मूर्ती प्राणप्रतिष्ठापना व कलशारोहन सोहळ्यात सहभागी व उपस्थित झाल्यानंतर मिळते असे सखाराम महाराज संस्थान अंमळनेरचे प्रमुख श्री प्रसाद महाराज अंमळनेरकर यांनी धामणी ग्रामस्थांना पाठवलेल्या शुभसंदेशात म्हटले असल्याचे वेदाचार्य मंदार क्षिरसागर यांनी यावेळी सांगितले.
