बंद पडलेल्या एस.टी.बसमुळे प्रवाशांना सहन करावा लागला मनस्ताप!!
आंबेगाव तालुक्यात नवीन एसटी डेपो चालू होऊन एक वर्ष झाले असून मंचर एस.टी डेपोला दहा ते पंधरा वर्षाच्या जुन्या एसटी बस दिल्याने या बस रस्त्यात वारंवार बंद पडत असल्याचे चित्र पहावयास मिळत आहे. दोन दिवसापूर्वी कळंब येथे प्रवाशांनी भरलेली एसटी बस अचानक बंद पडल्याने प्रवाशांना भर उन्हात ताटकळत उभे राहुन दुसऱ्या एसटीची वाट पहावी लागल्याने प्रवाशांनी, महिलांनी संताप व्यक्त केला आहे.
आंबेगाव तालुक्यात स्वतंत्र एसटी बस डेपो व्हावा ही प्रवाशांची २५ ते ३० वर्ष पासूनची मागणी होती. मागणीचा विचार करून माजी सहकार मंत्री व विद्यमान आमदार दिलीप वळसे पाटील यांच्या प्रयत्नातून ताबडेमळा अवसरी खुर्द येथे पाच एकर जागेत मंचर एसटी डेपो मंजूर केला गेला. एक वर्षांपूर्वी या एसटी डेपोचे उद्घाटन झाले व एसटी डेपो चालू झाला. मात्र राज्य परिवहन महामंडळाने मंचर एस टी डेपोला नवीन एसटी बस देण्याऐवजी दहा ते बारा वर्षांपूर्वीच्या जुन्या व कालबाह्य एसटी बस पाठवल्याने जुन्या एसटी बस रस्त्यावर वारंवार बंद पडल्याचे प्रकार घडत असून यामुळे प्रवाशांना नाहक त्रास सहन करावा लागत आहे. दोन दिवसापूर्वी कळंब हद्दीत सकाळी ११ वाजता एक एसटी बस अचानक बंद पडली होती. या बस बसमधील प्रवासी महिला लहान मुलांना कडेवर घेऊन रस्त्यावर दुसऱ्या एसटी बसची वाट पाहत होत्या. अचानक एसटी बंद पडल्याने महिलांनी संताप व्यक्त केला अशा घटना वारंवार घडत असून एसटी महामंडळाने मंचर डेपोला नवीन १५ ते २० एसटी बस द्याव्यात अशी मागणी पंचायत समितीचे माजी उपसभापती संतोष भोर यांनी केली आहे.
कळंब (ता.आंबेगाव) गावचे हद्दीत बंद पडलेल्या एसटी बसमुळे ताटकळत उभे राहुन दुसऱ्या एसटी बसची वाट पाहताना प्रवासी
